ბლოგის სახელზე დიდი ხანი ვიფიქრე, რაც თავში მომივიდა, ყველაფერი დაკავებული იყო. ერთსიტყვიანი სახელი მინდოდა, ოღონდ ისეთი, რაც რამეს ნიშნავს ჩემთვის და 1000 მცდელობის შემდეგ rawbau-ზე შევჩერდი. ვერ ვიტყვი, რომ rawbau-ში რამე ღრმა აზრი დევს, არც ისე ცნობილი ხორვატიული ჯგუფია, მაგრამ მოკლეა და თან მათი ერთი სიმღერა მომწონს (ხორვატიის ნაკრების წარმატებებს ეხება და გიტარაზე სლავენ ბილიჩი უკრავს :)).
ბლოგერობაზე საერთოდ არ მაქვს პრეტენზია. პირველ რიგში, იმიტომ, რომ დაწყებული საქმის შუა გზაზე მიგდება ჩემი ჰობია და შეიძლება ეს პოსტი პირველთან ერთად უკანასკნელიც აღმოჩნდეს. მეორეც, არ ვთვლი, რომ ბლოგის სტილში კარგად შემიძლია წერა. შემიძლია კარგად ვწერო საკონფერენციო თემები, ანალიტიკური ესეები პოლიტიკურ საკითხებზე, ე.წ. "ფეიფერები", მაგრამ არა ბლოგის პოსტები. ამიტომაც ეს ბლოგი კი არა, ბლოგის ბიძაშვილია :D ფიქციაზე ლაპარაკიც ზედმეტია. ჩემი მხრიდან სიყალბის აპოთეოზი იქნება, მოთხრობების და ლექსების წერას თუ დავიწყებ და მითუმეტეს, აქ თუ განვათავსებ.
ბლოგი მაინცდამაინც იმისთვის არ მინდა, რომ ბევრმა ადამიანმა წაიკითხოს ჩემი პოსტები. საერთოდ არავინ რომ არ შემოვიდეს, არც მაგაზე მექნება პრობლემა. უბრალოდ, ჩემი აზრების გადმოცემა და მოგვიანებით წაკითხვა მიყვარს. ამ მიზნით ზოგჯერ ე.წ. "დღიურს" ვიყენებდი, მაგრამ ხშირად მისი ჩანთიდან ამოღებაც მეზარება, წერაზე რომ არაფერი ვთქვა, თან ბლოგი ვიზუალური მასალის ჩამატების საშუალებას იძლევა.
მოვრჩი მგონი ახსნა-განმარტებებს :D :D
წარმატებები. ))
ReplyDelete